Pezullimi i ndeshjes për shkak të kërcënimit të arbitrave, FSHF cakton datën e ndeshjes midis Kastriotit dhe Bylysit

TIRANË– Federata Shqiptare e Futbollit pezulloi pak ditë më parë ndeshjen midis Kastriotit dhe Bylisit e cila ishte planifikuar për t’u luajtur në stadiumin “Kamza” më datë 9 prill.

Ndeshja sipas FSHF u pezullua pas kërcënimit që iu është bërë arbitrave të ndeshjes të cilët nuk kanë pranuar që të marrin përsipër organizimin.

Ditën e sotme FSHF ka vendosur që kjo ndeshje të luhet me datë 19, këtë herë në Elbasan Arena. Gjithashtu, FSHF bën të ditur se Kastrioti do t’i luajë të gjitha ndeshjet e mbetura deri në fund të sezonit në stadiumin “Elbasan Arena” për shkak se Policia e Shtetit nuk merr përsipër garantimin e sigurisë në stadiumin “Kamza”.

Deklarata e plotë

Federata Shqiptare e Futbollit dëshiron të informojë komunitetin e futbollit dhe opinionin publik se ndeshja Kastrioti-Bylis, e vlefshme për javën e 28-të të Abissnet Superiore, e planifikuar për tu zhvilluar më datë 9 prill 2023, do të zhvillohet të mërkurën e datës 19 prill në stadiumin Elbasan Arena duke filluar nga ora 15:00.

FSHF është në kontakt të vazhdueshëm me autoritetet ligjzbatuese për zbardhjen e ngjarjes së rëndë të ndodhur me zyrtarët e ndeshjes. Hetimet janë duke vazhduar dhe në të njëjtën kohë presim që gjithҫka të sqarohet sa më parë në mënyrë që gara të vazhdojë normalisht deri në fund.

Klubi Kastrioti do t’i luajë të gjitha ndeshjet e mbetura deri në fund të sezonit në stadiumin “Elbasan Arena” për shkak se Policia e Shtetit nuk merr përsipër garantimin e sigurisë në stadiumin “Kamza”.