Edi Rama shkarkon Arben Ahmetajn dhe Zef Mazin

TIRANË– Arben Ahmetaj dhe Zef Mazi janë shkarkuar nga detyra, duke u zëvëndësuar nga Belinda Balluku dhe Majlinda Dhuka.

Kështu, bëri të ditur kryeministri Edi Rama, mëngjesin e kësaj të hëne, ku u shpreh se tashmë prioritetet e Shqipërisë janë kriza energjetike si dhe integrimi i vendit drejt Bashkimin Europian.

Konkretisht, Belinda Balluku bëhet zv/kryeministre, duke zëvëndësuar Arben Ahmetajn, ndërsa Majlinda Dhuka, një profil i lartë teknik në vend të profilit të lartë diplomatik të ambasadorit Mazi, bëhet Kryenegociatore& Ministre Shteti pranë kryeministrit.

“Tani që prioriteti i Rindërtimit ia le vendin prioritetit të Negociatave me BE, ndërron profili i ministrit të Shtetit. Majlinda Dhuka, një profil i lartë teknik në vend të profilit të lartë diplomatik të ambasadorit Mazi, bëhet Kryenegociatore& Ministre Shteti pranë kryeministrit.

Energjia si sfida më kolosale e kësaj periudhe dhe infrastruktura si sfidë e pandërprerë kombëtare, janë bërë sot edhe marrëdhënie intensive me qeveri e institucione ndërkombëtare. Koha që roli i zv/kryeministrit të fokusohet në këto fusha. Belinda Balluku bëhet zv/kryeministre.

Falenderoj Arben Ahmetajn për kontributin në misionin tonë të përmbushur me një sukses spektakolar për Rindërtimin. Falenderoj Zef Mazin për kontributin në arritjen e madhe historike të çeljes së negociatave; dy bashkëpunëtorë të vlefshëm në një rrugë sfidash që vazhdon.”- njofton Rama.