Tashmë e konfirmuar, Sabah Sheta kandidat i Partisë Demokratike për Bashkinë Krujë

KRUJË- Tashmë e konfirmuar, Sabah Sheta është kandidati i Partisë Demokratike për Bashkinë Krujë.

Në një reagim në rrjetet sociale, Sheta ka konfirmuar lajmin dhe nuk ka kursyer as sulmet ndaj kryeministrit Rama.

Sheta e konsideroi nder dhe privilegj detyrën që i është ngarkuar, teksa njoftoi se beteja sapo ka nisur.

Postimi i plotë:

Të nderuar bashkëqytetarë krutanë kudo që ndodheni

Askush më mirë se ju nuk e di se sa e vështirë është bërë jetesa dhe se si sot bashkia nuk i shërben qytetarëve dhe interesave të tyre. Unë jam çdo ditë me ju, duke përcjellë shqetësimet tuaja, hallet e përditshme. E di se mezi prisni që të vijë dita për ta ndryshuar situatën ku ndodheni e me votën tuaj të zgjidhni njeriun, që i njeh hallet tuaja dhe që do të përpiqet t’i zgjidhë ato.

Duke marrë në konsideratë kërkesën tuaj të vazhdueshme, të cilën e dëgjoj kudo ku takohemi në mënyrë të përsëritur, duke vërejtur me keqardhje mungesën e sherbimeve dhe diskriminimin tuaj te regjimit të Edi Ramës, kam pranuar të kandidoj për Kryetar të Bashkisë së Krujës.

E marr këtë vendim me përgjegjësi dhe i motivuar nga detyrimi për t’ju shërbyer ju dhe për të bërë gjithçka për një jetë më të mirë për bashkëqytetarët e mi.

Për mua është nder dhe privilegj të jem kandidat i Partisë Demokratike të Shqipërisë, partisë që rrëzoi muret e izolimit nga bota perëndimore, partisë që lindi si shpresë e shqiptarëve, dhe unë do të bëj gjithçka që më përket mua që kjo parti të vazhdojë të jetë parti e vlerave dhe shpresave të shqiptarëve, aleate e vendeve demokratike, Shteteve të Bashkuara të Amerikës, Bashkimit Europian dhe Britanisë së Madhe.

Le ta nisim së bashku këtë betejë për Krujën, krutanët, për të rinjtë dhe të rejat e bashkisë tonë.

Bashkë ne mund të bëjmë ndryshimin për Krujën!

Me shumë respekt dhe mirënjohje.

Sabah Sheta