“Rithemelimi” do të zhvillojë sot protestën e radhës kundër Qeverisë

TIRANË– Grupi i “Rithemelimit” ka thirrur ditën e sotme më 12 nëntor, ora 16:00, protestën kombëare, me moton: Shqipëria në rrezik, protesto! T’i dalim zot bashkë”.

Ish-kryeministri Sali Berisha, në një deklaratë për mediet, prezantoi disa nga risitë e saj, ndër të tjera, alternativën anti-krizë që propozon Partia Demokratike dhe  opozita në tërësi për përballimin e situatës së vështirë ekonomike në vend.

“Edhe njëherë, ftoj çdo shqiptar, demokrat dhe demokrate, qytetarë pa parti, anëtar të partive të tjera politike opozitare, por edhe socialistë, që janë shumë më afër me ne se me sektin e Rilindjes, të bashkohemi për kauzën tonë të drejtë nesër, – theksoi Berisha, – dhe të çelim me atë protestë, një lëvizje të fuqishme që ka si synim madhor, përmbysjen e këtij regjimi antishqiptar. Ka si synim madhor, rikthimin e Shqipërisë në standardet demokratike, votën e lirë. Ndëshkimin e hajdutëve të pasurive publike dhe fondeve publike, shpartallimin e krimit të organizuar me zero tolerancë ndaj tij. Ka si synim madhor që vendimet për Shqipërinë dhe shqiptarët të mos merren në Beograd, të mos merren në Ankara, por veçse në Tiranë. Të largojmë një person, një antishqiptar, një armik të qenies shqiptarë, të lirive dhe të drejtave tona. Protesta, ju po e shihni, sirenat e zemërimit dhe urrejtjes ndaj kësaj qeverie, të dhimbjes, sakrificës dhe mjerimit, po ulërijnë në zemrat e të gjithë shqiptarëve në të katër anët e vendit. Ndaj shpreh mirënjohje të pakufishme për ata që do mbushin rrugët dhe sheshet e Tiranës. Rroftë protesta. Rroftë populli opozitar,” tha Berisha.

Dega e “Rithemelimit” në Krujë ka bërë të ditur se ka nisur një organizim por ende nuk ka informacione se sa do të jetë numri i pjesmarrësve.