Poetja krutane dënohet, pasi ndërtoi pa leje shtëpinë e prishur nga tërmeti

TIRANË– Gjykata e Tiranës ka dënuar me 40 orë në shërbim të komunitetit, poeten krutane Mimoza Ahmeti, për ndërtim të paligjshëm.

Gjykata ka pranuar kërkesën e prokurorisë së Tiranës pasi e akuzoi poeten shumë të njohur shqiptare se ndërtoi një banesë në vendin ku e  kishte në Petrelë.

Prokuroria më shumë se një vit më parë, më 23.09.2021 ka marrë njoftimin se po kryhej ndërtim pa leje, dhe pasi Policia ka shkuar në fshatin Petrelë, është konstatuar një objekt i papërfunduar, dy katësh me kolona betoni ndërsa në atë moment nuk po kryheshin punime ndërtimi.

Por poetja ka deklaruar se punimet janë kryer në vendin e shtëpisë së saj ekzistuese që u shemb nga tërmeti. Ajo pretendonte se kishte marrë lejen e rindërtimit dhe punimet ishin kryer nga muaji maj i vitit 2021.

Por në përgjigje të prokurorisë, Drejtoria e Përgjithshme e Planifikimit dhe Zhvillimit të Territorit pranë Bashkisë Tiranë informon se ‘nga verifikimi i sistemit elektronik e-lejet konstatohet se nuk ka aplikim për leje ndërtimi, rindërtimi apo rikonstruksioni dhe riparimi të ndërtesës së dëmtuar nga fatkeqësia natyrore’.

Ahmeti u bë kështu rasti i dytë i personazheve të njohur që dënohet pas këngëtarit Bojken Lako.