Masakra me 3 viktima në Fushë-Krujë, grupi hetimor zbulon makinën që ndoqi të rinjt

KRUJË– Detaje të reja janë zbardhur nga vrasja e trefishtë që tronditi vendin më 17 korrik të vitit 2022, nga një atentat në mbikalimin e Fushë-Krujës.

Brilant Martinaj, Dikler Vata dhe Besmir Hoxha, të cilët mbetën të vrarë, dyshohet se u ndoqën nga një makinë tip “Volkswagen Polo” e bardhë, e cila ka dhënë informacion tek vrasësit për lëvizjen e automjetit ku udhëtonte Martinaj, Vata dhe Hoxha.

Së fundmi është mësuar se kjo makinë është fiksuar nga disa kamera sigurie pasi ka vezhguar lëvizjet e viktimave nga një servis automjetesh në zonën e “Treshit” në Kamëz e deri në afërsi të mbikalimit ku ndodhi atentati.

Hetuesit kanë dyshime se makina tip Polo e bardhë me targa shqiptare të vjedhura, pasi iu ka dhënë informacionin e duhur atentatorëve është larguar në drejtim të Rinasit. Në këtë makinë, dyshohet se kanê qenë dy persona që kanë luajtur rolin e informatorëve të vrasësve.

Pavarësisht gjurmimit të disa kamerave të sigurisë, ende nuk është bërë e mundur gjetja e këtij automjeti “Polo” që vëzhguesit kanë përdorur. Dyshimet janë se ky automjet është çmontuar menjëherë pas kryerjes së atentatit.

Ndërkohë vlen të thuhet se edhe pse kanë kaluar 7 muaj që nga ky atentat, hetuesit ende nuk kanë asnjë gjurmë të autorëve pasi këta të fundit mendohet se janë profesionistë që kanë “punuar” me kujdes.