Jo vetëm Qafë-Shtama, malësia e Krujës ka një mori destincionesh turistike të cilat janë ende të pazbuluara

KRUJË– Kur vjen puna për turizmin malor në Krujë, ka një mori destincionesh të cilat janë ende të pazbuluara.

Së fundmi në redaksinë e Kruja.info, ka mbërritur një foto nga fshati Shretë, i njësisë administrative Cudhi, Krujë. Sikurse shihet, pamja që ofron kjo zonë është e mrekullueshme, sidomos nën “vellon” e bardhë të dëborës.

Në këtë zonë gjendet edhe mali i Kavanijes, i cili ka një lartësi prej 1421 metra.  Emrin “kava nije”, mendohet se, e ka marrë nga një kavo gjigante, e cila ndodhej e varur nga maja e malit, që sipas banorëve, kjo kavo përdorej për ankorimin e anijeve në lashtësi. Specialistët dhe historianët kanë gjetur gjurmë të qeramikës dhe gurë të çmuar në majën e këtij mali, por gojëdhënat flasin se aty duhet të ketë qenë vendosur një kambanë e madhe, e cila vihej në lëvizje nëpërmjet kavos gjigante, deri në fund të malit. Maja e malit përbëhet nga dy shkëmbinj gjigant me një të çarë në formë kanioni në mes të tyre, ku mendohet se ka qenë e varur kambana. Meqë kavoja ishte tejet e trashë dhe ngjasonte me kavot e ankorimit të anijeve, banorët e kanë quajtur atë “kavo e anijes”, – një toponim i mbetur kështu edhe malit të Kavanijes.