I FUNDIT/ Goditet grupi kriminal në Krujë

KRUJË– Në kuadër të një operacioni policor të koduar “Formacioni”, shërbimet e Komisariatit të Policisë Krujë kanë goditur një grup kriminal të përfshirë në disa raste vjedhjesh në zonën e Fushë Krujës. Si rezultat i këtij operacioni, janë vënë në pranga 4 autorë dhe janë shpallur në kërkim 3 të tjerë.

Operacioni u organizua pas hetimeve të thelluara dhe denoncimeve nga qytetarët, çka mundësoi identifikimin e 7 personave të përfshirë në këtë aktivitet kriminal. Njëri prej të arrestuarve, shtetasi A. B., 24 vjeç, ishte tashmë në kërkim për dy vepra të tjera penale: “Shkatërrimi i pronës” dhe “Largimi nga vendi i aksidentit”.

Në kuadër të operacionit, u arrestuan:

• A. B., 24 vjeç, banues në Kamzë, në kërkim edhe për vepra të tjera penale;
• G. L., 33 vjeç, banues në Kamzë;
• K. B., 29 vjeç, banues në Kamzë, i cili u kap në flagrancë duke drejtuar një automjet të marrë me qira, të përdorur nga grupi për të realizuar dhe për t’u larguar nga vendngjarjet. Automjeti u sekuestrua si provë materiale.

Ndërkohë, janë shpallur në kërkim:

• G. V., 22 vjeç, banues në Kamzë;
• L. K., 33 vjeç, banues në Kamzë;
• F. B. (D.), 33 vjeç, banues në Kamzë.

Gjithashtu, si pjesë e këtij grupi kriminal është identifikuar edhe A. R., i cili ndodhet tashmë në burg për vjedhje.

Hetimet e deritanishme kanë zbuluar se:

• Më 27 mars 2025, të 7 personat e identifikuar, në bashkëpunim me njëri-tjetrin, kanë vjedhur 16 000 lekë në një subjekt për transferta parash.
• Më 28 mars 2025, 6 prej tyre kanë vjedhur 21 celularë në një dyqan.

Policia vijon punën për kapjen e të dyshuarve të shpallur në kërkim, ndërsa Prokuroria e Tiranës po udhëheq hetimet për dokumentimin e plotë të veprimtarisë kriminale të këtij grupi.