(EMRAT+VIDEO)/ Dalin pamjet e banesës në Krujë brenda së cilës kultivohej kanabis

KRUJË– Policia e Krujës ka reaguar në lidhje me kanabisin e gjetur ditën e djeshme në fshatin Dërven të Krujës.

Policia thotë se në kuadër të operacionit të koduar “Derveni”, në vendin e quajtur “Kodër Dushk”, në fshatin Derven, në banesen e një shtetasi që aktualisht jeton në Greqi, është zbuluar që kultivoheshin bimë narkotike.

Në kuadër të këtij operacioni, në përfundim të veprimeve të para hetimore u bë shpallja në kërkim e shtetasve Qerim Xeka (babai), Kledi Xeka dhe Lutfi Xeka (2 djemtë e tij), të cilët kishin në ruajtje banesën ku Policia zbuloi 2 ambientet e përshtatura për kultivim të bimëve narkotike.

Gjithashtu këtyre shtetasve, iu gjet dhe iu bllokua edhe një furgon brenda të cilit Policia gjeti pajisje të shumta elektrike që do të shërbenin për përshtatjen e ambienteve të tjera të banesës, për kultivim të bimëve narkotike, me llamba.

Vijon puna intensive për kapjen e të 3 shtetasve të shpallur në kërkim. Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.