Detaje nga shpërthimi me tritol në Fushë-Krujë, autorët e hodhën lëndën plasëse në lëvizje

KRUJË– Një shpërthim me tritol ka ndodhur mbrëmjen e djeshme rreth orës 22:40, në lagjen “Magaze”, Fushë-Krujë.

Sipas Policisë, në oborrin e banesës së shtetasit Mehemt Baftjari, 54-vjeç, ka shpërthyer një sasi e vogël e dyshuar lëndë plasëse, duke shkaktuar dëme të vogla materiale.

Paraprakisht mësohet se autorët, persona ende të paidentifikuar e kanë hedhur lëndën plasëse në ecje. Ata raportohet të kenë qenë me makinë dhe lëndën plasëse e kanë hedhur nga dritarja e mjetit në drejtim të banesës.

Për pasojë, janë thyer të gjitha xhamat e dritareve e dyerve të banesës. Në momentin që ka ndodhur shpërthimi, familja ndodhej në banesë, por fatmirësisht asnjë prej tyre nuk është plagosur.

Grupi hetimor ndodhet në vendngjarje dhe po punon për sqarimin e rrethanave të ngjarjes, me qëllim identifikimin dhe kapjen e autorit/ëve.