Atentati me 1 viktimë në Tiranë, gjendet një makinë e djegur në Bubq

TIRANË- Një masakër ka ndodhur mbrëmë rreth orës 21:05, në rrugën “Ananstas Shundi”, në lokalin në pronësi të shtetasit Fatjon Murataj, në rrethana ende të paqarta, nga persona ende të paidentifikuar, ku ka vdekur një grua dhe plagosur 5 të tjerë.

Sot, një automjet tip “BMW X6” është gjetur e shkrumbuar në afërsi të Bubqit në Fushë-Krujë dhe mendohet se është mjeti që përdorën autorët. Brenda saj janë gjetur dy kallashnikovë.

Makina i është dorëzuar kriminalistikës në mënyrë që të hetohet për gjetjen e gjurmëve të mundshme. Persona të paidentifikuar qëlluan me breshëri plumbash në drejtim të lokalit të Fatjon Muratit duke lënë të vdekur banakieren Mimoza Paja, 60 vjeçe dhe pesë të tjerë të plagosur, mes tyre dhe një vajzë 10-vjeçare që u dëmtua nga xhamat e thyer.

Të plagosurit e tjerë janë Sahit Murati (xhaxhai i Fatjon Muratit), Astrit Meraj, Emanuel Sala, Ermir Bejuku, Genc Shohalli, të gjithë jashtë rrezikut për jetën. Murati vetë ndodhej jashtë Shqipërisë në momentin që u krye atentati.

Ai është i njohur në botën e krimit dhe si miku i ngushtë i Endrit Dokles, madje është marrë në pyetje për masakrën e Fushë Krujës, ku mbeti i vrarë Brilant Martinaj me dy miqtë e tij.