Policia: Bashkë me Klodjan Keqin u arrestuan edhe 2 persona të tjerë

KRUJË– Policia ka reaguar zyrtarisht në lidhje me arrestimin e Klodjan Keqit.

Policia tha se në kuadër të operacionit të koduar “Horizonti”, bashkë me Keqin janë arrestuar edhe 2 persona të tjerë.

Klodjan Keqi, 40-vjeç, akuzohet për veprat penale “Vrasja” dhe “Mbajtja pa leje e armëve të zjarrit dhe municionit luftarak”.

Gjithashtu, shërbimet e policisë, së bashku me 40-vjeçarin, kapën dhe arrestuan në flagrancë, për veprën penale “Përkrahja e autorit të krimit”, edhe shtetasit: L. K., 25-vjeç dhe L. Gj., 30-vjeç, të cilët po shoqëronin dhe ndihmonin autorin e dyshuar për t’u larguar nëpërmjet kufirit të gjelbër për në shtetin grek.

Shtetasi K. K., më datë 10.08.2022, rreth orës 09:45, pas një konflikti për dru zjarri, në një zonë të pyllëzuar në fshatin Zgërdhesh, Krujë, plagosi me armë zjarri shtetasin L. H., i cili si pasojë e dëmtimeve të marra, humbi jetën në spital.

Grupi hetimor, nën drejtimin e Prokurorisë së Rrethit Gjyqësor Krujë, po vijon punën për dokumentimin e plotë ligjor të kësaj ngjarjeje.