Fushëkrujsi tenton të transportoi kanabis me kamion, arrestohet bashkëpunëtori i tretë

KORÇË– Policia e Korçës ka vijuar me operacionin e koduar “Restart 11”, i zhvilluar ditën e djeshme ku u arrestuan 2 persona.

Policia arrestoi sot edhe bashkëpunëtorin e tretë, shtetasin e shpallur në kërkim me iniciale E. K., 33-vjeç, banues në fshatin Xhafzotaj, Durrës.

Ndalimi i tij u bë në zbatim të urdhrit të datës 04.08.2022, të nxjerrë nga Prokuroria pranë Gjykatës së Shkallës së Parë Korçë, për veprën penale “Trafikimi i narkotikëve”, kryer në bashkëpunim, mbetur në tentativë, në lidhje me ngjarjen e ndodhur në Pikën e Kalimit Kufitar Kapshticë, ku u ndaluan shtetasit M .R., 58 vjeç, banues në Tiranë dhe A. M., 45 vjeç, banues në Fushë-Krujë, të cilët me mjetin tip kamion të markës “Scania”, tentuan të trafikonin në drejtim të Turqisë, 101 kg lëndë të dyshuar narkotike kanabis, e cila u sekuestrua në cilësinë e provës materiale.

Nga ana e Policisë po vijojnë hetimet intensive për dokumentimin e plotë të kësaj veprimtarie kriminale.

Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme.