DURRËS- Është arrestuar mbrëmjen e djeshme nga Policia e Durrësit autori i cili hodhi në erë portën e shtëpisë së Armando Dukës.
Policia njofton se ka arrestuar shtetasin Arlen Hasanaj 34 vjeç, banues në lagjen nr.4, Durrës, për veprat penale “Shkatërrimi i pronës me eksploziv” dhe “Mbajtja pa leje dhe prodhimi i armëve, armëve shpërthyese dhe i municionit”.
Arestimi i këtij shtetasi u bë pasi, nga veprimet e para hetimore, dyshohet se është autori i vendosjes së tritolit në portën e jashtme të banesës së shtetasit Armand Duka, ngjarje e ndodhur në datën 24.01.2022.
Hasanaj ka në pronësi një biznes bar kafe dhe market, Euroshop.
Nga shpërthimi i lëndës plasëse nuk pati dëmtime të mëdha, ndërsa kreu i FSHF Armand Duka dyshon se këto ngjarje kanë të bëjnë me zhvillimet e fundit për sa u përket zgjedhjeve në Federatën Shqiptare të Futbollit.
Ai ka treguar edhe një mesazh kërcënues të ardhur në celularin e tij, ku i kërkojnë të japë dorëheqjen në të kundër do e vrasin.
"Bazuar në Ligjin Nr.35/2016 “Për të drejtat e autorit”, ndalohet kopjimi, riprodhimi dhe publikimi i informacionit pa cituar burimin e tij."
